• २०७७ जेठ १८ आइतबार

कपिलवस्तुमा कोरोना त्रासले उपचार नपाउदाँ एक महिलाको ज्यान गयो

स्वास्थ्यकर्मीका कारण ज्यान गुमाउनेको सङ्ख्या १३ पुग्यो


कोरोना भाइरसको त्रासले कपिलवस्तुमा एक महिलाको उपचार नपाएर अकालमै ज्यान गएको छ । जिल्लाको यशोधरा गाउँपालिका वडा नं. ७ रंगपुरकी अन्दाजी ३६ बर्षीय कलामुन निशाको उपचार नपाउँदा मृत्यु भएको हो ।
आइतबार राति ज्वरोले च्यापेपछि निशालाई नीजि सवारीको सहायताले कपिलवस्तु अस्पताल तौलिहवा ल्याइएको थियो । त्यहाँ अस्पतालले भर्ना गर्न नमाने पछि विरामीका आफन्तले उनलाई तत्काल भैरहवा लगेका थिए । 
भैरहवा मेडिकल कलेजले पनि उनलाई भर्ना नलिए पछि पुनः कपिलवस्तु अस्पताल ल्याएको यशोधरा गाँउपलिका वडा नं. ६ अध्यक्ष श्याम नारायण उपाध्यायले  बताउनुभयो । भैरहवाबाट पुनः दोस्रो पटक पनि कपिलवस्तु अस्पतालले भर्ना गर्न नमानेपछि विरामीका आफन्तले निशालाई घर लगेको उपाध्यायले बताउनुभयो । सोमबार विहान यो विषय कपिलवस्तुका प्रमुख जिल्ला अधिकारी दीर्घ नारायण पौडेललाई सुनाए पछि कपिलवस्तु अस्पतालमा ल्याएको र अस्पताल परिसरबाटै चिकित्सकले मृत घोषणा गरिदिएको मृतकका ससुरा सरिफ खाँले बताउनुभयो । मृतक निशालाई तीन दिन पहिला सामान्य ज्वरो आएर तौलिहवास्थित एक मेडिकलबाट औषधि खाएको खाँले बताउनुभयो । 
सामान्य टाईफाइट भएको भन्दै स्थानीय मेडिकलले दिएको र त्यो औषधिले काम नगरेपछि उनलाई आइतबार राति अस्पताल ल्याइएको उहाँले बताउनुभयो । उनलाई ज्वरोले च्याप्दै लगेपछि अस्पताल ल्याएको भएपनि चिकित्सकले भर्ना नलिदा आफ्नो बुहारीको अकालमा ज्यान गएको उहाँले गुनासो गर्नुभयो । साथै उहाँले एम्बुलेन्स खोज्दा तत्काल नपाएपछि नीजि सवारी साधन प्रयोग गरेको सुनाउनुभयो । 
सामान्य ज्वरो आएका विरामीलाई अस्पतालले भर्ना नगर्दा अकालमै महिलाको ज्यान गएको गाउँपालिकाका वडा अध्यक्ष उपाध्यायले बताउनुभयो । चिकित्सकले विरामीलाई भर्ना गरेको भए ज्यान जाने स्थिती आउने थिएन होला उपाध्यायले भन्नुभयो ।
कपिलवस्तु अस्पतालका मेसु डा. किशोर बञ्जाडेसंग यो विषयमा बुज्न खोज्दा आफु फिल्डमा रहेकोले अस्पतालमै आएर कुराकानी गर्ने बताउनुभयो । यो विषयबारे कुरा राख्दा डा. बञ्जाडेले विरामीको बाटोमै मृत्यु भैसकेको स्विकार गर्नुभयो । तर, किन आइतबार राति भर्ना नगरे भन्ने प्रश्नमा अस्पतालमै आएर बुज्न उहाँले आग्रह गर्दै फोन राख्नुभयो । 
उता कपिलवस्तुका प्रमुख जिल्ला अधिकारी दिर्घ नारायण पौडेलले विरामीलाई अस्पतालले भर्ना नगरेको भन्ने गुनासो आफुलाई आज विहानमात्र आएको बताउनुभयो । यो सुनेपछि आफुले कपिलवस्तु अस्पताललाई किन भर्ना नगरेको भनेर सोधेको र त्यहाँ उपचारका लागि लैजान विरामीका आफन्तलाई तत्काल भनेको  बताउनुभयो । 
अहिले विरामीको मृत्यु भैसकेको भन्ने आफुलाई थाहा नभएको उहाँले बताउनुभयो । यो बेला जिल्लाका कुनै पनि अस्पतालले विरामीलाई भर्ना गर्न नमाने आफुलाई तुरुन्त फोन हान्न उहाँले आग्रह गर्नुभयो । आफुले चौबिसै घण्टा फोन उठाउने भन्दै समस्या परे तत्काल फोन हान्न उहाँले अनुरोध गर्नुभएको छ । 
विश्वभर महामारीको रुपमा फैलिएको कोरोना भाइरसको त्रासले सामान्य ज्वरो आएका विरामीलाई पनि भर्ना नगर्ने क्रम बढेको छ ।
 

प्रतिकृया दिनुहोस

सम्बन्धित समाचार

ताजा अपडेट

अर्थ / वाणिज्य

समाचार